Mario Diz é un músico que desenvolve a súa carreira profesional vencellada a diversos proxectos; director da OUSC (Orquestra da Universidade de Santiago de Compostela), a cal dirixe desde o ano 2010. Como discípulo do mestre Antón García Abril, nos últimos anos leva a cabo unha intensa actividade compositiva para diferentes agrupacións profesionais e didácticas, entre as que, recentemente, destacan estreas absolutas nas Xornadas de Música Contemporánea organizadas polo CNDM e o encargo de *Tres Piezas Para Banda* por parte da Banda Municipal de Música de Santiago de Compostela.

Compuxo diversas pezas para diferentes agrupacións de cámara, nas que merece unha mención especial a estrea e gravación por parte da laureada mezzosoprano Nuria Lorenzo da suite de nanas *Todos os Nenos Soñan* para a formación de Mezzo, Viola e Arpa.

Doutor en Educación pola Universidade de Vigo, actualmente é profesor de didáctica da expresión musical na Universidade de Santiago de Compostela. De 2008 a 2016, foi membro do equipo directivo da Escola Municipal de Música de Santiago de Compostela, onde na actualidade tamén exerce como profesor de violín e viola. A súa paixón pola didáctica destes instrumentos reflíctese na publicación da metodoloxía *O Meu Primeiro Violín* para a iniciación en idades temperás, que inclúe máis de 20 pezas compostas expresamente para este obxectivo, así como en numerosos estudos comparados sobre as diferentes metodoloxías de ensino da corda fretada.